爆一爆｜一舖衰三代（Louise）

同一位富貴收租佬吹水， 電話傳來聲線有點顫抖，即問候老哥何解如此懊惱？ 原來午夜夢迴發咗個噩夢，「唉！發夢啲租客退租啊！」

下載Yahoo財經APP

美股外幣即時報價 多國新聞任睇

租金劈至$6萬都照殺

此君乃是極保守的收租佬，成手磚頭食幾代都食唔哂，但依然危機感極高。

早於通關前面對現實，其位於銅鑼灣波斯富街地舖，高峰期租予一家表行，月租$60萬，疫情之時租客冚旗退租， 即揾到一賣運動用品租客，租金劈至$6萬都照殺；誰不知呢位租客玩咗一年多都頂唔順退租。今年再肯劈兼有3個月免租期，揾到新租客，月租$7.5萬。而佢老哥在上環另一內街地鋪；一直以$5萬租予一賣零食租客，見市况不濟都減至$2.8萬，希望個租客捱得掂。

難怪佢老哥自嘲：「做業主慘過做契弟。」謂在現時經濟環境必須要揸住「宗旨」或「中指」做生意，就係要街坊價、益食家嘅思維，好似經營兩餸飯就掂喇，否則沒有生存嘅能力。呢位收租公非常貼市，知道有非上市嘅商場大業主 ，為求租客撐住個商場，只收管理費及雜費而已，所以唔腳軟就假。

坐着等市道好轉係發夢

自疫情爆發起計，香港捱了超過三年零八個月，坐着等市道好轉乃是發春夢，倒不如面對現實劈租搶客，與坊間一些言論指業主加租弄至舖頭執笠大有出入。

其實業主肯唔肯劈租都要先照下鏡，小妹呢位老友嘅物業全部都冇按揭，而且揸咗幾十年，基本上沒有成本，租得出起碼抵消下差餉及雜費，如果在高峰期如 2017或2018年前後摸頂入市的業主，分分鐘 由本來的「一鋪養三代」淪落為「一鋪衰三代」，租金冇返咁上下嘅「yield 」又點向借錢嘅銀行交待呢？所以寧願丟空都唔肯減租，亦有業主怕減租後加唔番亦丟空。

80年代嘅日本曾因為資產價格泡沫，出現供樓供三代嘅苦況，當時首都圈嘅物業都是天價，日本人嘅人工不足以供樓，於是形成一樓供三代嘅苦況。 觀乎香港樓價依然未跌完，外圍貨幣如日圓、 南韓圜、 印尼盾、 印度盧比 以至祖國嘅人民幣，過去兩年起碼跌左一成有多，港元在聯繫匯率下，唔貶值的話惟有資產價格調整，有眼你睇長實（1113.HK）都肯做「衰仔」，新盤蝕住賣，未來樓價走勢如何都唔使多講。