雅虎香港財經 CFO財報解密│Tesla股價急升背後嘅不確定性（Benny）
Elon Musk 4月28日突然訪問北京後，中國汽車工業協會就隨即宣布包括Tesla在內，以及另外五間中國車廠獲得數據安全預防措施批准。呢個訊息象徵意義係令市場憧憬Tesla喺中國展開自動駕駛業務嘅重要障礙經已掃清，所以4月29日股價一晚大升14%。
美股外幣即時報價 多國新聞任睇
平價車計劃未放棄
Elon Musk 喺Tesla第一季業績澄清放棄平價車計劃謠言之餘，仲強調會加快推出平價車型，於是由4月22日Tesla今年低點142美元計起，短短一星期股價已累升37%到194美元，彷彿一個星期前仲係喺地獄嘅Tesla呢一刻一天光晒、前途一片光明。
1月24日，Elon Musk喺業績會主動話2024年增長會陷低潮，加上佢要求額外股權嘅問題，令Tesla股價由207美元跌到182美元，跌幅達到12%。3月中Wells Fargo調低對Tesla評級，認為佢係無增長嘅公司。加上4月初又有消息指Tesla會放棄令佢有機會重拾汽車銷售增長嘅平價車型計劃，令股價再進一步跌到165美元。
之後嘅FSD減價50%、全球大裁員10%、Cybertruck回收、美國今年減息無望，種種負面因素令Tesla股價由年頭嘅248美元累計跌43%到4月22日嘅142美元。但就正如開頭所講嘅因素，短短一星期時間Tesla股價就大翻身，由142美元狂升37%到194美元。
今年1月尾嘅2023年Q4業績會，Elon Musk所講嘅平價車計劃，係一種顛覆整個汽車行業、下一代造車技術，令造車成本比起現有技術大幅降低，實現推出USD25000一架、極具競爭力平價車型。背後訊息都係想講電車市場競爭極度激烈，如果生產技術無新突破，以現有成本架構下電動車價錢已經減無可減，所以喺推出新型車款前2024年銷售增長將會放緩。
推平價新車仍不明朗
但4月24日嘅2024年Q1業績會，佢就改變口風話會用現有生產設施加快推出平價車型，但就無再提顛覆性嘅下一代造車技術。即係由當初長遠徹底提升生產技術、效率嘅計劃，變成一個唔知點樣可以以現有生產設施再減低成本（一季前佢CFO講過現有技術降本空間有限）新方案。換一個角度思考：如果現有設施可以生產到平好多嘅車型，點解呢一刻唔即刻做呢？所以就算一切好理想喺2024年底、2025年初加快出平價車型，咁究竟呢種所謂嘅新車型真正減低成本幅度、提升利潤空間、增加市場場競爭力嘅成效有幾多，其實呢一刻仲有好多不確定性。
至於自動駕駛業務，如果最終打入中國市場當然令市場興奮。但要明白實質對佢業務增長、利潤貢獻，唔會係呢一、兩年內會睇到嘅事情。因為目前自動駕駛業務收入只佔Tesla 總收入未夠1%。而長遠嚟講，道路訊息數據傳送監管、先進芯片限制、國內其他車廠自動駕駛系統嘅競爭，呢一刻來自對Tesla喺中國發展自動駕駛業務憧憬嘅股價升幅，其實都係仲有好多變數。
Benny Yam
執業會計師
本欄隔周三刊出
